Vieiros

Na actualidade, o equipo da factoría viguesa Denso está formado por máis de 190 empregados. Todos eles están de vacacións desde o venres pasado, agás unha pequena parte adicada a labores de inventariado. A data fixada para a reincorporación é o próximo 7 de xaneiro, coincidindo coa propia data marcada pola planta de Citroën para reiniciar a súa actividade.

Para daquela, a empresa deseñou un plan de despido masivo, Expediente de Regulación de Emprego (ERE), que prevé que saian fóra até 58 traballadores. Segundo explica o secretario do comité de empresa, Martín Ponte, e o representante da CIG, Xurxo González, o acordo estabelece a saída en concreto dos empregados das liñas de produción para a Opel. Despedimentos que se producirían entre decembro e xaneiro. Os traballadores recibirían así o soldo íntegro ao chegar ao paro, pagando o 70% a administración e o 30% a empresa.

Así e todo, a empresa comprometeuse a paralizar o ERE no caso de que o Goberno estabeleza finalmente un sistema de subvencións para o sector da automoción ao que poida optar a factoría. Aseguran desde a empresa que a primeira metade do ano podería implicar novos despedimentos debido á situación do sector.