Vieiros

"Demasiada información para analizar con rigor os criterios de avaliación en tan pouco tempo". Ese é o argumento exposto este luns polos representantes das consellarías de Medio Ambiente e e Política Territorial, xestionadas polo PSdeG, para abandonar a comisión de valoración do concurso eólico. Láianse os socialistas de que aos técnicos de Industria levoulles meses "e non chegaron en prazo", e agora a consellaría pretendería ofrecerlles apenas unha tarde para revisar a baremación de cada un dos 170 proxectos que optan ao concurso.

O prazo de resolución, prorrogado até esta semana con data límite para o próximo venres 26, tiña cita este mesmo luns para a xuntanza da comisión de valoración, nunha soa reunión e sen límite horario marcado. Ao fío, o conselleiro de Traballo e vicesecretario xeral do PsdeG, Ricardo Varela, opinou nesta mesma xornada que a ausencia dos socialistas se debería "á falta de información suficiente".

"O importante é o listado final", di Blanco
"Un sempre prefire unanimidades, pero non lle imos dicir a ningún dos membros que ou como ten que votar", analizou ao respecto o conselleiro de Industria. "O que teñen é que traballar para buscar unha proposta, que será a que leven", engadiu Fernando Blanco preguntado ao respecto.

A beira do BNG no Goberno xa contaba con maioría na comisión de valoración, con ampla representación para o departamento de Industria e voz tamén para Medio Rural, polo que se agarda que o proxecto saia con beizón unánime despois da saída dos socialistas do proceso. Nese sentido, Blanco insistiu en que esta semana estará sobre a mesa a resolución definitiva que adxudica os 2.325 megavatios do concurso eólico. "O substantivo é que esta comisión traballe para facer o listado final en función da valoración de cada proxecto para que presenten a resolución que se asinará a posteriori", puntualizou o conselleiro.

"Poxa trucada", acusa o PP
"Ante o movemento inxente de diñeiro do que estamos a falar e ante o feito de que incluso dentro do bipartito hai disputas e discrepancias, o lóxico é suspender o concurso para dar prudencia e seguridade ás adxudicacións", aproveitou para expoñer o PP este luns.

Ao respecto da que cualificou de "maior movemento de cartos" en Galiza nos últimos anos, o presidente do PPdeG, Alberto Núñez Feijoo, agoirou que rematará" nos tribunais" e teimou en que o Goberno suspenda o actual proceso de concurso eólico "para garantirlle prudencia e seguridade ás adxudicacións". Na opinión de Feijoo, debera ser o executivo que saia das urnas o próximo mes de marzo o que retome o proceso. Ademais, subliñou Feijoo a necesidade de que se resolva "no Consello da Xunta" e "non por unha consellaría contra as demais".