Vieiros

No medio do caos xerado polos ataques non hai aínda datos claros, malia que se fala de medio milleiro de feridos e máis de cen mortos. O lanzamento de vinte mísiles que o exército israelí fixo sobre a franxa de Gaza podería ser chanzo previo a unha operación militar por terra. O primeiro ministro Ehud Barak insinuou a posibilidade en declaracións públicas. Segundo Barak, o ataque tiña o obxectivo de eliminar "operativos terroristas de Hamás", entre outros, presuntos almacéns de armamento e campos de adestramento.

Desde a zona, achéganos crónica Moncho Iglesias:
A mañá do venres, varias tropas de Papá Noeis guindaban pedras, como agasallo de Nadal, a militares israelís. Isto ocorría durante as protestas semanais que se concentran, todos os venres, dende hai varios anos, na cidade cisxordana de Nil’in. Esa mesma mañá, dende a Franxa de Gaza, os Comités de Resistencia Popular manifestaban que secuestrarían unha soldada para que Gilad Xalit, o soldado que leva preto de 1000 días secuestrado, puidese formar unha familia. Do mesmo xeito, nos últimos días intensificáronse os lanzamentos de foguetes dende Gaza a Israel, acabando a tregua de seis meses e o que provocou que a resposta a estas intimidacións chegase a mañá do sábado.

Un ataque aéreo, que tiña por obxectivo eliminar varios complexos pertencentes a Hamas, acabou coa vida, cando menos, de 140 persoas e feriu 200. Nestes momentos, un fume negro recobre toda a Franxa de Gaza, tras unha das operacións militares máis duras nos últimos anos. Mentres, o presidente palestino Mahmoud Abbas pide calma, dende Cisxordania, á vez que en Gaza se chama a ataques que vinguen o masacre deste sábado que, tras os 30 mísiles lanzados nas últimas horas, aínda continúa.