Vieiros

"Estamos traballando para que non se extingan contratos". Estas foron as palabras de Emilio Pérez Touriño ao remate do Consello de Goberno deste xoves. Mentres, en Vigo a dirección da planta do grupo PSA-Peugeot-Citroën mantiña unha xuntanza co comité de empresa para aclarar os termos nos que a baixada de ventas (que xa chega até o 30%) seguirá afectando aos traballadores.

Emilio Pérez Touriño adiantou ademais que a intención do executivo galego é mediar para que "todas as decisións sexan pactadas", e que vaian na liña de "flexibilizar e acomodar horarios e xornadas". Estas declaracións fanse na mesma semana na que a dirección da planta automobilística propuxese aos sindicatos reducir a produción de coches en febreiro. Actualmente a planta viguesa conta con preto de 1.400 empregados menos que hai un ano, logo de que máis de 800 traballadores con contratos temporais quedasen sen o seu posto por mor da supresión da quenda de noite da liña que fabrica o modelo C-4 Picasso.

Finalmente, o xefe do executivo galego tamén adiantou que o vindeiro luns o Ministerio de Industria publicará a orde que regule o Plan de Industria e Competitividade do goberno central. O Conselleiro de Industria, Fernando Blanco, xa barallara a posibilidade de que Galiza reciba máis de 250 millóns de euros para o sector do automóbil no marco desta iniciativa. Con todo, Touriño avogou tamén por outras medidas adoptadas no ámbito galego, en concreto no marco do Foro da Automoción.