Vieiros

As tensións no seo do Movemento pola Base (MpB) continúan. Esta quinta feira, o sector crítico co xeito de actuar de CIG e BNG publicou na súa web (.net) un documento titulado A CIG que Galiza precisa no que deixan clara a súa intención de "promover e artellar listas alternativas" ao vindeiro Congreso Confederal da Central Sindical, que se desenvolverá os días 20 e 21 de xuño deste ano.

Ao parecer, este sector considera que "as organizacións sociais non deben ter como único obxectivo nin final o de nutrir a organización política de militancia", algo que, ao seu ver, está a pasar no nacionalismo galego tamén coas organizacións ecoloxistas e mesmo cos sindicatos, e que, segundo contan, "foi e é determinante para o seu continuo desmembramento, para a súa constante febleza e para o seu incesante desgaste".

Neste sentido, falan da utilización da CIG, unha organización que, ao seu ver, "ten potencialidade para servir á transformación social na nosa nación". Por isto, sinalan, "o seu control pasou a ser unha prioridade urxente para a 'organización do goberno', máis aínda logo da tentativa de asalto ao SLG".

Dende este sector do MpB pensan que no vindeiro Congreso Confederal "está en xogo a supervivencia da CIG como obxecto de liberación nacional e social en si mesmo". Neste sentido, e tal como pasou no seo mesmo do MpB, "cando a Mesa Nacional se viu na obriga de proceder a expulsar da organización as persoas que actuaban en defensa dos intereses do BNG no Goberno, e dos seus intereses persoal, curiosamente todos eles pertencentes á Executiva ou das Secretarías Confederais da CIG", van promover esta candidatura, mais contando con outros sectores dentro da CIG, non vinculados ao seu proxecto político.

"A CIG non é un patrimonio de ninguén en exclusiva, nin dos liberados nin dos integrantes dos organismos"
Segundo lle contou a Vieiros un membro da Mesa Nacional de MpB, decidiron conxuntamente publicar este artigo na web para "explicar un pouco o que aconteceu no seo do Movemento, a partir de explicar o que está a acontecer na CIG". "É algo do que non nos sentimos moi orgullosos, pero hai cousas que pasan así e que se poden ir das mans, que son incontrolábeis, mais que acontecen".

En canto á confección das listas alternativas, o militante de Pola Base sinalou que "o proceso aínda está en marcha, e pensamos contar con máis xente dentro da CIG que non milite no MpB". "Primeiro hai que completar o proceso, e cando estea, farémolo público, pero hai que dicir que a idea non xurdiu dun ámbito concreto, senón de distintas comarcas e federacións por todo o país, e non vai ir máis alá da definición que se recolle neste documento ("a procura da independencia sindical; dun sindicalismo combativo, participativo e non pactista;un sindicalismo do mundo "laboral actual real"; cun posicionamento claro sobre o papel de contra-poder que xoga a fundación para a formación (FORGA) na Central Sindical; e unha Central Sindical que fuxa do actual proceso de centralización case absoluto do poder de decisión en mans dunha parte das persoas que conforman a Executiva e o Secretariado Confederal")", sinalou o militante, ao tempo que destacaba que o proxecto "darase a coñecer cando exista un corpo máis amplo que o apoie, que exceda o Movemento pola Base dunha forma clara".

Para aclarar un bocado o que está a acontecer no seo deste movemento -que hai que ter en conta que tivo a súa orixe no mundo sindical, de onde procedían a maioría dos seus cadros-, este membro da Mesa Nacional empregou como exemplo o que hai meses aconteceu no seu do Sindicato Labrego, "onde unha sección maioritaria tentou quedar co control da organización, mais naquel caso non puido ser; desta volta vai ser ao revés, xa que na CIG o sector maioritario sería o mesmo que foi a oposición no caso do SLG".

"Cando se achega un Congreso, todo o mundo ten intereses por ter representación na Executiva"
Vieiros púxose en contacto co secretario xeral da CIG, Suso Seixo, para coñecer a súa opinión sobre esta posíbel candidatura de aqueles que non están de acordo co rumbo que colleu a organización da que é secretario xeral. Seixo, militante da UPG, sinalou que aínda é cedo para falar do Congreso Confederal da CIG xa que "quedan seis meses, e hai que preparar os relatorios". mais que se estea artellando unha candidatura alternativa "non é raro, o raro sería que non houbese candidaturas alternativas, porque sempre as houbo, e no caso de que non exista xustificación para crealas, invéntase".

En canto ás críticas recibidas dende esta sección de MpB, Suso Seixo sinalou que a CIG "leva tempo traballando nesta liña, e co apoio dunha parte maioritaria dos militantes, e nunca houbo unha discrepancia relevante. Tamén é verdade que cando se achega un Congreso, hai un movemento considerábel, e agora que estamos en perspectivas de preparar o deste ano, aparecen intereses por ter representación na Executiva da Central Sindical, e tamén están no seu dereito. Pero non é un tema que nos preocupe nada", reiterou o secretario xeral da CIG.

Para entender un bocado o que aconteceu no seo do Movemento pola Base:

• (29/10/2007) O Movemento pola Base aposta na súa asemblea constituínte por rematar coa "deriva" do BNG
• (06/11/2007) O Movemento pola Base censura que o BNG "publicitase" os candidatos antes de que debatera o Consello Nacional
• (29/08/2008) Pola Base oponse a que o BNG escolla o candidato á Xunta nunha asemblea de delegados
• (02/01/2009) Movemento pola Base convoca unha asemblea para "construír novas alternativas"
• (09/01/2009) Cruce de acusacións polo control das siglas do Movemento pola Base