Vieiros

Un novo caldeiro de auga fría caeu este mércores enriba dos traballadores da fábrica viguesa de PSA Peugeot Citroën. Logo de que a dirección anunciase hai uns días o paro da súa actividade durante varias xornadas dos meses de febreiro e marzo para axustar o seu horario aos recortes de produción, o director da planta, Pierre Ianni, asegura agora que non desbota presentar un Expediente de Regulación de Emprego (ERE) temporal a partir de marzo. Subliñou que para a empresa que representa esta decisión sería "un último recurso", se ben a cualificou como "unha medida de flexibilidade máis".

"Traballamos con calendarios a curto prazo", dixo, ao tempo que adiantou que esa posíbel decisión se tomaría dentro de dous meses. Con todo, si clarificou que, chegado o caso, este sería un "ERE temporal e conxuntural", forzado pola necesidade de recortar o persoal por mor da redución de demanda.

Axudas públicas
Tamén este mercores, Ianni presentou ante o Ministerio de Industria as liñas do plan industrial plurianual de PSA Peugeot Citroën para optar ás axudas previstas para o sector. Malia que non quixo especificar a cantidade solicitada, recoñeceu que é unha cifra próxima aos 250 millóns de euros. Nesta liña pediu apoio urxente para "incentivar a venda de coches" e adiantou que "as consellerías tamén se pronunciarán sobre o xeito no que poderán complementar o achegado polo Ministerio".

Pola súa banda, o presidente da Xunta pediu á factoría viguesa que "aproveite ao máximo" o Plan Estatal da Automoción, para evitar "situacións traumáticas no eido laboral" e para "reforzar a competitividade do sector". Asegurou que a Xunta está a traballar "conxuntamente coa dirección de Citroën para afrontar as dificultades no plano inmediato". Ademais, Pérez Touriño asegurou que xa mantivo conversas co presidente do goberno, Rodríguez Zapatero, e co ministro de Industria, Miguel Sebastián, para que o sector galego "quede en boa posición".