Vieiros

Vieiros de meu Perfil


Edición xeral

RSS de Edición xeral
Cambio na Casa Branca

Obama ordena o peche de Guantánamo no prazo dun ano

O presidente de EUA asina o decreto que lle pon fin ao centro de detención, e outro que prohibe os malos tratos nos interrogatorios.

Redacción - 19:15 22/01/2009
Obama asina o decreto

Obama asina o decreto

O novo presidente de EUA, Barack Obama, asinou esta quinta feira, no seu segundo día de goberno, un decreto que ordena o peche do centro de detención de Guantánamo no prazo dun ano e outro que prohibe os malos tratos nos interrogatorios a detidos.

Obama ratificou o documento rodeado por militares e membros do seu Executivo no Despacho Oval da Casa Branca, logo dunha reunión para discutir sobre a política de detención dos sospeitosos de terrorismo.

Neste senso, o mandatario estadounidense rubricou un decreto que prohibe os abusos durante os interrogatorios e que exixe que os investigadores respecten as Convencións de Xenebra.

"A mensaxe que enviamos ao mundo é que EUA ten a intención de continuar o combate estabelecido contra a violencia e o terrorismo, que o faremos con vixilancia, que o faremos con eficiencia e que o faremos respectando os nosos valores e os nosos ideais", afirmou.

"Como dixen na miña investidura, non perpetuaremos o falso dilema entre a nosa seguridade e os nosos ideais", engadiu Obama.


1/5 (1 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: