Vieiros

Primeiro no mercado de Teis (Vigo) e logo na praza de abastos de Pontevedra, Emilio Pérez Touriño, reiterou os seus compromisos en materia de muller e dependencia. O secretario xeral do PsdeG prometeu que a vindeira lexislatura será a da aplicación da Lei de Dependencia. Así, asegurou que para promover unha maior conciliación da vida familiar e laboral, se crearán nos vindeiros catro anos 10 mil prazas en escolas infantís. Nesta liña, tamén se comprometeu a ampliar o horario de apertura dos centros educativos co ofrecemento dun maior número de actividades extra-escolares e a universalizar os comedores.

No referente ás políticas de igualdade, Touriño adiantou que o seu partido apostará por discriminar positivamente ás empresas para que realicen proxectos neste sentido, que fomenten igualdade salarial entre homes e mulleres. Asemade, garantiu a apertura de xulgados contra a violencia de xénero nas sete grandes cidades galegas e propuxo a creación dun fondo de indemnizacións para as mulleres maltratadas. Neste eido, recordou o seu compromiso de formar un goberno paritario e de apostar polo incremento de mulleres en postos de responsabilidade. Así, aproveitou para pedir ás mulleres que lle dé a "forza dos seus votos": "non pararei até facer realidade o soño dun país en igualdade; voten aos que fan da igualdade o seu motivo para estar en política", insistiu.