Vieiros

Esta fin de semana dispútase na localidade española de Marbella a primeira edición da Copa de Platú 25, unha modalidade de vela non olímpica. Nesta competición estarán dúas embarcacións galegas: o Tuypan Caixanova, con Alberto García e Marcos Pérez; e o Vilagarcía, dos irmáns Paz. No último barco navegará Antón Paz, que despois de ser campión olímpico e mundial na clase tornado ao lado de Fernando Echávarri está nunha fase de reorientación da súa carreira deportiva, tomando contacto con diferentes modalidades da vela.

Os principais rivais dos galegos para a vitoria final serán o Bribón, de Marc de Antonio; o barco La Revoltosa, patroneado por Axel Rodger; o Renault de Iñaki Castañer. A competición comeza o venres ás 12 da mañá e está previsto que se disputen 9 regatas, sendo obrigatorio que se celebren polo menos dúas para que a proba teña validez.