Vieiros

Vieiros de meu Perfil


Euskadi

Edición xestionada por Vieiros
RSS de Euskadi
XA NON PRECISAN O APOIO DE UPyD

Confírmase que o voto emigrante devolve ao PSE o escano de Araba

O PNV reúnese este venres con Aralar, EA, EB e os de Rosa Díez logo de o facer cos socialistas e non chegar a ningún acordo. O luns é a quenda do PP.

Redacción - 12:15 06/03/2009
Patxi López semella cada vez máis preto da lehendakaritza

Patxi López semella cada vez máis preto da lehendakaritza

Este venres fixéronse públicos os resultados do reconto do votos emitidos polos emigrantes vascos nas pasadas eleccións. Tal e como se agardaba, o voto das persoas que residen fóra do estado devolve ao PSE o deputado que EA lle arrebatara no final do reconto realizado o día das eleccións. O partido de Patxi López sobe así até os 25 escanos, a cinco do PNV, mentres que EA quedaríase en só un, confirmando o maior fracaso electoral da súa historia.

A principal consecuencia desta mudanza é que agora a suma dos 25 escanos do PSE de Euskadi e os 13 do PP dan como resultado os 38 votos que Patxi López precisaría para ser investido lehendakari. Isto supón que o bloque formado por PSE e PP xa non precisaría o voto ao seu favor de UPyD para deixar ao PNV fóra da lehendakaritza. Esta suba do PSOE esclarece o panorama despois de que o PP reiterara nos últimos días a súa intención de apoiar aos socialistas na investidura, aínda que os dous partidos non teñan un acordo de goberno para a vindeira lexislatura.

Continúan os contactos para a formación do goberno
O xoves celebrouse, na sede do PNV en Bilbao unha reunión entre os dirixentes de PSE e PNV coa intención de analizar os resultados electorais do pasado domingo e comezar a falar da formación dun goberno. A reunión durou pouco máis de media hora e os dous partidos abandonaron da mesma sen achegar posturas, xa que ambos manteñen a pretensión de que saia das súas formacións o vindeiro lehendakari.

Na reunión, o PNV propúxolle ao PSE un "acordo de estabilidade" que inclúa as institucións vascas e estatais, deixando entrever a posibilidade de retirar o apoio ao PSOE en Madrid se non acadan un acordo en Euskadi. O presidente do EBB Iñigo Urkullu considerou "sorprendente" que os vascos lles pregunten como respondería o PNV se o PSE lle devolvera a proposta feita polos jeltzales mais encabezada por Patxi López. Urkullu critica que os socialistas non teñan un proxecto claro e falen de "elixir lehendakari e despois xa se verá".

Pola súa parte, o PSE emitiu un comunicado na súa páxina web no que mantén a súa vontade de "abrir unha nova etapa, cun novo liderado" en Euskadi. No comunicado explícase que o PSE agardará o seu momento (cando o PNV remate de falar cos diferentes partidos) e iniciará "unha rolda de contactos para conformar un Goberno Vasco". Este venres continúan as reunións na sede do PNV e será o momento dos representantes de Aralar.


0/5 (0 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: