Vieiros

Este xoves comezou a funcionar en Francia unha polémica páxina web. Faismesdevoirs.com (faime as tarefas) permitiralles aos rapaces pagar para que estudantes maiores lles fagan os exercicios. As respostas a problemas matemáticos custan cinco euros, mentres que un traballo de fin de curso con diapositivas e notas terá un prezo de 80 euros.

O éxito da iniciativa foi tal, que as visitas saturaron o servidor, polo que na web aparece unha mensaxe que indica que se volverá abrir o luns. A web, fundada por Stéphane Boukris, foi recibida con alarma polo profesorado, segundo informou Reuters.

"É aterrador. Contradí o propósito do ensino, que é que o alumnado aprenda a facer o traballo por si mesmo", declarou Agathe Field, profesora de inglés nun instituto de París. "Convérteos en consumidores. A mensaxe é que con cartos podes conseguir os resultados que queiras. É absurdo", dixo.

Boukris defendou a web, afirmando que os escolares aprenderán cos exercicios mercados porque virán con notas dos estudantes explicando como chegaron ao resultado final. "Non só lles estamos a dar o peixe, estámoslles a aprender a pescar", asegurou o autor da páxina. "Claro que algúns alumnos poderían usar o sistema para facer trampas, pero terán que aprender antes ou despois que non imos estar alí o día do exame".