Vieiros

O CGAC renova os seus contidos nesta primavera, e faino amosando a riqueza dos seus fondos a dos depósitos das coleccións ARCO e Ordóñez-Falcón. 'Pequena historia da fotografía'. comisariada por Manuel Segade, poderá verse até o 3 de maio. Segade propón unha reflexión persoal sobre a historia da fotografía contemporánea a través da relectura dos xéneros clásicos da arte como recadros interpretativos. O punto de partida da exposición é unha peza homónima do mexicano Iñaki Bonillas, que toma o título dun ensaio de Walter Benjamin. Naquela obra Benjamin propoñía "desmantelar a posibilidade do analfabetismo fotográfico", ofrecer ferramentas para a deconstrución crítica dos procesos de creación das imaxes e, por tanto, cuestionar a produción cotiá e mecánica de individuos en sociedade.

Así pois, a través das fotografías de Wolfgang Tillmans, Pierre Gonord, Tacita Dean, Andrés Serrano, Manuel Vilariño ou Virxilio Viéitez, percórrese a evolución do xénero, da fotografía, que nalgún momento deixou de verse e pasou a lerse. A exposición, segundo Segade, permite "mostrar claramente o modo en que se retorcen os xéneros, o modo no que o seu uso agudiza a posta en crise das súas preconcepcións".

A mancha humana
A outra exposición que abre as súas portas esta semana, A mancha humana, estará até o 31 de maio. Ten como obxectivo presentarlle ao público dende unha perspectiva diferente un dos movementos artísticos máis importantes da segunda metade do século XX, a Arte Conceptual. A tese central da alemá Elle Blumenstein é que a lóxica racionalista coa que adoitamos identificar a Arte Conceptual: a neutralidade, a pureza (moi presente, por exemplo, no minimalismo dos anos setenta), ten matices e é discutíbel.

Blumenstein toma dunha novela de Philip Roth o título da mostra, unha metáfora de que esa presenza subxectiva, carnal, sempre estivo presente na arte conceptual. Por suposto a partir dos neoconceptuais dos anos oitenta e noventa, pero mesmo antes. Na mostra pódense ver obras de Donald Judd, Carl André, Sol LeWitt, Richar Prince, Jac Lernier, Martha Rosler, Ana Mendieta, Helena Almeida, Liam Gillick ou Dora García.