Vieiros

Vieiros de meu Perfil


Edición xeral

RSS de Edición xeral
No lento proceso de reforma da lei electoral

O BNG insiste en que se estabelezan circunscricións "autonómicas" para as europeas

O abano de propostas achegadas polo Bloque no Congreso solicita tamén fixar unha circunscrición electoral para os residentes no exterior.

Redacción - 17:00 19/03/2009

Á porta dos comicios europeos o BNG aproveita para sublilar a necesidade de modificar o actual sistema electoral. Os nacionalistas galegos entenden que "as comunidades autónomas son os entes territoriais que definen a singularidade do Estado Español". Por este motivo, e poñendo como exemplo o caso de Alemaña, solicitan que a circunscrición electoral nas eleccións europeas sexan as comunidades autónomas.

É unha das iniciativas que inclúe o documento de propostas sobre procedemento electoral que o Bloque levou á subcomisión para a reforma da lei electoral (LOREX). No informe ocupa espazo destacado o asunto do voto emigrante, apartado onde o BNG insiste na necesidade de equiparar os procedementos do exercicio de voto dos residentes no exterior cos contemplados para os residentes "en territorio estatal". "O BNG non comparte as dificultades esgrimidas polo Consello de Estado para avanzar nalgunhas das cuestións", reprochan sobre este tema, urxindo a que o voto da emigración se realice en urnas instaladas en embaixadas, consulados ou outros centros públicos.

Ao respecto da emigración, o Bloque tamén se manifesta a prol dunha circunscrición electoral para os residentes no exterior. Ademais, chaman a atención sobre a necesidade de "diferenciación entre nacionalidade e recoñecemento do dereito ao sufraxio". A proposta do BNG contempla que ese dereitoquede vencellado "a ter nacido no Estado Español e á acreditación dun determinado período de residencia".

Queixa polas tentacións "presidencialistas"
Ao respecto das eleccións municipais, opinan desde o Bloque moi criticamente contra as propostas que "pretenden a substitución do sistema de representación proporcional" para a elección dos rexedores por un sistema maioritario. Tal extremo é considerado polos nacionalistas como a instauración dun "sistema presidencialista" que non beneficiaría os cidadáns.

Tamén ao fío dos comicios locais, interpretan que debería "reconsiderarse" a posibilidade de outorgarlle dereito a voto aos residentes ausentes. E no caso de mantela, pensan que "debería vincularse o seu exercicio á existencia dun vínculo real do elector co municipio".


3.86/5 (7 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: