Vieiros

Vieiros de meu Perfil


Edición xeral

RSS de Edición xeral
DENUNCIA DE VERDEGAIA

A central térmica das Pontes, maior fábrica de mudanza climática do Estado

A asociación ecoloxista exixe o peche das centrais térmicas de carbón galegas por ser ineficientes, moi contaminantes e por producir importantes danos ambientais.

Redacción - 11:00 23/03/2009
En Galiza, as emisións de gases invernadoiro por habitante son de 12,4 toneladas, fronte ás 9,9 do Estado

En Galiza, as emisións de gases invernadoiro por habitante son de 12,4 toneladas, fronte ás 9,9 do Estado

"Aquí comeza a mudanza climática". Perante unha faixa con este lema manifestáronse os activistas da asociación ecoloxista Verdegaia diante das centrais térmicas de carbón e de gas natural das Pontes. Denunciaron así as súas elevadas emisións de dióxido de carbono, o principal gas invernadoiro causante das alteracións climáticas. Segundo denuncian, esta central térmica é "a maior fábrica de mudanza climática do Estado Español, xa que emite ela soa máis CO2 que toda Navarra ou Estremadura.

As estatísticas son alarmantes: no período 2005-07, a fábrica das Pontes emitiu unha media anual de 9,12 millóns de toneladas de dióxido de carbono, é dicir, máis que o acumulado por todo o sector do transporte galego (6,9 millóns). Pero é que ademais, xunto coa central de carbón de Meirama, esta cantidade representa 37% das emisións totais de Galiza. En 2006 (último ano para o que se dispón de datos oficiais) as emisións de gases invernadoiro por habitante foron de 12,4 toneladas, fronte ás 9,9 do Estado e as 10,4 da Unión Europea.
 
Demandas para o futuro
Verdegaia exixe o peche das centrais térmicas de carbón das Pontes e de Meirama, ás que acusan de seren ineficientes e moi impactantes: dunha banda pola emisión de CO2, e da outra pola contaminación local por partículas e gases acidificantes. Ademais, fan fincapé nos danos ambientais producidos pola minería de carbón, o combustíbel fósil máis contaminante que, na súa opinión, debe ser substituído polo aforro e polas enerxías renovábeis. Só deste xeito, din, é posíbel unha política enerxética sustentábel que reduza o consumo galego e as exportacións de electricidade.


Ligazóns

5/5 (19 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: