Vieiros

Vieiros de meu Perfil


Edición xeral

RSS de Edición xeral
A ano e medio das próximas eleccións

Racha o pacto de goberno na USC

Quince días despois da dimisión do vicerreitor Fernández Prieto, e logo de que Senén Barro non accedese aínda a relevalo.

Redacción - 13:45 24/03/2009
Senén Barro, reitor da USC

Senén Barro, reitor da USC

As vicerreitoras e vicerreitores do colectivo Universidade Aberta (UA), anunciáronlle ao reitor da Universidade de Santiago (USC), Senén Barro, "o abandono do goberno da USC". A decisión chega tras dúas semanas agardando a que o reitor formalizase o relevo de Lourenzo Fernández Prieto, despois da dimisión deste do seu posto á fronte da vicerreitoría de Relacións Institucionais.

"Neste contexto, condicionado polas posicións feitas públicas pola PUP e por unha teimosía sen futuro, UA entende que o presente require maior decisión, audacia e valentía", sosteñen nun comunicado asinado por María Dolores Domínguez Santos, vicerreitora de Profesorado e Organización Académica, Xoán Carlos Carreira Pérez, vicerreitor de Infraestruturas, Celia Besteiro Rodríguez, vicerreitora Adxunta de Infraestruturas e Servizos e Elias J. Torres Feijó, vicerreitor de Cultura.

Desde o contorno da Plataforma Universitaria Progresista (PUP), que avala ao actual reitor, daban por roto o acordo de goberno desde hai días. Nese sentido, posicionáronse en favor dunha remodelación do equipo que pilota a institución do que saísen os representantes de UA e entrasen independentes e membros de Converxencia Universitaria (CU), actual socio minoritario.

Reconfiguración do goberno con eleccións no horizonte
"Non se trata de saír do paso senón que é necesario realizar unha reorganización profunda", analizaba ao respecto o reitor da USC, Senén Barro, este martes en conferencia de prensa. "Non vou mirar etiquetas e non aceptarei nomes de ningunha plataforma porque si", explicou Barro ao respecto da súa estratexia de agora en diante.

A ano e medio dunhas eleccións ás que el mesmo non poderá presentarse novamente, xa que finaliza o seu segundo mandato, Barro asegurou non ter "ataduras" para conformar un novo equipo que garanta un futuro "sólido e críbel" para a USC. O reitor confirmaba así que na mañá deste martes os vicerreitores do colectivo Universidade Aberta lle presentaran oficialmente as súas dimisións. "Sinto esta decisión, no persoal e no institucional", indicou. Segundo a explicación de Barro o pacto racha por ser "inasumíbel" a reorganización de "persoas" e "competencias" proposta por UA. Os representantes deste colectivo convocaron para a tarde deste martes unha conferencia de prensa onde exporán a súa reflexión ao respecto do acontecido.


4/5 (3 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: