Vieiros

Vieiros de meu Perfil


Galego.org

Xestionado por Vieiros
RSS de Galego.org
Paralizada a iniciativa do PP

O Parlamento Europeo tumba as teses dos grupos contra o galego

O texto, que rexeitara as emendas de PSOE, CiU, PNV e ICV, pedía que os Estados garantisen o dereito dos pais a elixir a lingua da educación dos fillos.

Redacción - 18:30 24/03/2009
A fotografía gañadora de 'Unha Imaxe para o Galego 2008', asinada por Roberto Roget (Pica para ampliar)

A fotografía gañadora de 'Unha Imaxe para o Galego 2008', asinada por Roberto Roget (Pica para ampliar)

A iniciativa, presentada na Comisión de Cultura, pedíalles aos Estados membros da Unión Europea que garantisen o dereito dos pais a escoller a lingua na que se educan os seus fillos en estados como o español, onde coexisten varios idiomas oficiais. Presentada polo Partido Popular Europeo na Eurocámara, ía na liña das teses dos colectivos que a comezos de febreiro se manifestaron en Compostela pola derrogación do marco lexislativo sobre normalización lingüística.

Porén, esta terza feira o Parlamento Europeo aprobou un texto completamente distinto, que subliña a necesidade de prestar unha atención especial aos alumnos que non poidan estudar na súa lingua materna, e non menciona por ningures a idea de que os pais poidan escoller a lingua na que se eduquen seus fillos. Tamén destaca que é "esencial" salvagardar o "multilingüismo nos países ou rexións nas que coexistan dúas ou máis linguas oficiais", ao tempo que se "garanta a plena intelixibilidade interlingüística", en especial para as persoas en idade avanzada. Nesta liña, destacan como áreas de especial importancia a xustiza, a sanidade, a administración e o emprego.

A resolución, promovida polos grupos socialista, liberal e Verdes-ALE, foi aprobada con 335 votos a favor, 279 en contra e 69 abstencións.

A loita pola promoción das "linguas minoritarias" e a aceptación da "diversidade"
A Eurocámara tiraba, deste xeito, a iniciativa do Partido Popular Europeo, suprimindo algúns parágrafos redactados polo deputado portugués Vasco Graça Moura, que xa foran aprobados pola comisión de Cultura; entre eles a solicitude para que ningún escolar sexa privado do ensino na lingua oficial do Estado, que tamén advertía do "erro" de "promover unha lingua a costa dos dereitos dos falantes doutra".

Porén, o que a resolución presentado hoxe defende é a "necesidade" de promover a aprendizaxe de distintas linguas, o multilingüismo e a diversidade lingüística na UE, incluídas as linguas "rexionais e minoritarias".

A Mesa acusa o PPdeG de ter empregado esta inicitiva na campaña electoral, converténdoa nunha "mentira"
Ao coñecer a noticia, A Mesa pola Normalización Lingüística celebrou que o Parlamento europeo "tirase abaixo as emendas presentadas polo PP", ao considerar que esta iniciativa, tal e como foi formulada polos populares europeos, "seguía principios de racismo lingüístico, de que hai linguas con dereitos e linguas sen dereitos, linguas de primeira e linguas de segunda".

Nesta liña, dende esta asociación destacan que o propio PP sabía que a iniciativa, tal e como fora redactara, non había saír adiante en Europa, mais que os membros do partido "mentiron" en Galiza, durante a pasada campaña electoral, "facéndolle crer á opinión pública" que este relatorio realmente era un "apoio do Parlamento Europeo" ás súas posturas, "contrarias á galeguización do ensino".

Alén disto, A Mesa reclámalle ao PP que "deixe as mentiras, a demagoxia e os ataques incívicos contra a nosa lingua" ao tempo que lle lembra que debera "pedir desculpas" por non ter contado a verdade de xeito "compulsivo" e polos seus ataques contra un idioma "con tantos problemas sociais e desamparos xurídicos como ten o galego".


4,84/5 (31 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: