Vieiros

Unha empresa coruñesa acaba de desenvolver o primeiro sistema de fotoblogs 2.0 creado no país. Chámase iFotoAlbum.net e é unha aplicación web da empresa Igasoft. Aínda que o portal xa existía dende o ano 2005, foi agora cando se reconverteu para darlle o enfoque de rede social que caracteriza a web 2.0.

Segundo explican os seus responsábeis, o novo servizo pretende aproveitar as características das redes de fotoblogs de máis éxito e engadirlles as últimas innovacións da web 2.0. Así, ademais de permitir a inclusión dunha fotografía e dun texto cada día, iFotoAlbum permite adxuntar vídeos e audio para completar as entradas diarias.

Ademais, prevén ir engadindo novas funcionalidades, tamén como parte da filosofía 2.0. Entre as materias pendentes está ofrecer unha versión en galego, pois actualmente está exclusivamente en castelán.