Vieiros

Vieiros de meu Perfil


Edición xeral

RSS de Edición xeral
Manifestación estatal

Contra os transxénicos, a Zaragoza

A Plataforma Galega Antitransxénicos denuncia a descoordinación das institucións e o seu descoñecemento sobre o tema.

Redacción - 09:30 16/04/2009

Será o vindeiro sábado 18 de abril en Zaragoza. Case un cento de organizacións de todo o Estado, entre as que se atopan a Plataforma Galega Antitransxénicos (PGA) defenderán o dereito das persoas a unha alimentación saudábel, rexeitando o negocio dos organismos manipulados xeneticamente. O lema da marcha será "Por unha alimentación e agricultura libre de transxénicos" e a organización galega porá a disposición dos interesados autobuses de balde que sairán dende Santiago de Compostela.

A PGA anima os galegos a sumárense a esta protesta e denuncia "descoordinación por parte das institucións públicas", ao tempo que aseguran que os responsables públicos en moitos casos "descoñecen as funcións que teñen que exercer para defender correctamente o medio ambiente". Nesta liña, unha das voceiras da organización, Montse Valencia, acusou á Consellaría que dirixiu na última lexislatura Manuel Vázquez de "reiterados incumprimentos" no seu cometido de preservar o entorno e lamentou a falta de transparencia.

Sen información exacta sobre as leiras transxénicas galegas
A Plataforma recorda que xa remitiu escritos ás consellarías de Medio Ambiente e Medio Rural para que ofrecesen información sobre a situación exacta das parcelas nas que se introduciron estes cultivos en Galiza, sen recibir contestación até o de agora. Ante esta situación, formalizaron unha queixa ante o Valedor do Pobo pola falta de resposta. Dende o colectivo lamentan esta actitude e lembran unha sentenza do Tribunal de Xustiza das Comunidades Europeas que recoñece que "non se pode manter en segredo a información que realice unha descrición global dos organismos manipulados xeneticamente, nin a súa finalidade, nin o lugar de liberación, nin os usos, métodos ou plans de emerxencia e avaliación de riscos".

Malia que, de momento, non é posíbel saber con exactitude onde e cantos produtos transxénicos se están a producir en Galiza, a PGA xa presentou alegacións contra a autorización concedida polo Ministerio de Medio Ambiente, Medio Rural e Mariño (MARM) para a realización de ensaios con millo manipulado xeneticamente en cinco concellos galegos: Arzúa, Ribeira, Mesía, Vilalba e Chantada.


Ligazóns

5/5 (4 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: