A atleta vilagarciá comeza este sábado unha carreira que durará 24 horas e na que medirá o seu nivel nunha disciplina na que aínda non leva un ano.
Cristina González
A ultrafondista vilagarciá Cristina González García disputa esta fin de semana o 7º Campionato Mundial de Ultrafondo, na modalidade carreira de 24 horas. A competición terá lugar na localidade italiana de Bergamo e tomarán a saída un total de 222 deportistas, repartidos en 70 na categoría feminina e 152 na masculina. A carreira disputarase sobre un circuíto rectangular de 1133 metros, comezou este sábado ás 10 da mañá, para rematar o domingo á mesma hora.
Cristina é unha das seis integrantes do equipo estatal, partindo coa segunda mellor marca deste combinado (178 quilómetros), que acadou o pasado mes de decembro nunha carreira celebrada en Barcelona. As favoritas son as atletas francesas, rusas e xaponesas, mentres que Cristina aproveitará o evento para coñecer o nivel de competición da elite mundial e ir collendo experiencia. A vilagarciá será, xunto á sueca Emelie Andersson, a atleta máis nova da competición.