Vieiros

Como xa avanzara pola mañá Xosé Luís Baltar, Antonio Rodríguez Miranda ocupará a nova figura de voceiro do PPdeG cando remate o XIV congreso do partido que se desenvolve esta fin de semana na Coruña. O presidente da formación popular e único candidato á reelección, Alberto Núñez Feijoo, confirmou o dato.

Rodríguez Miranda será a "voz" do partido e formará parte das cinco vicesecretarías do PPdeG. O resto estarán integradas por Marta Rodríguez Ares, Rosendo Fernández, Xosé Manuel Rey Varela e Chema Figueroa.

Pola súa banda, o conselleiro da Presidencia, Alfonso Rueda, seguirá a ser secretario xeral e Xosé Manuel Barreiro, vicepresidente. Ambos os dous formarán parte da lista que Feijoo someterá ao referendo dos compromisarios do PPdeG. O Comité Executivo do partido conservador renovará o 40% dos seus integrantes.