Vieiros

Vieiros de meu Perfil


Edición xeral

RSS de Edición xeral
Ao estimárense os resultados "máis frouxos" do ano

As accións de Inditex baixan un 2,11%

A caída na Bolsa foi causada polas expectativas dos analistas, que lle auguraron á multinacional galega uns pequenos resultados no primeiro trimestre do ano.

Redacción - 09:00 19/05/2009
Unha das tendas de Inditex, da marca Zara, en Toquio

Unha das tendas de Inditex, da marca Zara, en Toquio

As accións de Inditex baixaron esta segunda feira un 2,11% na Bolsa, ante as baixas expectativas dos analistas sobre os resultados do primeiro trimestre do exercicio fiscal da empresa téxtil -entre o 1 de febreiro e o 30 de abril-, que estiman que serán "os máis frouxos" do ano, cun crecemento das vendas inferior ao 7%.

Analistas de Fortis consultados destacaron que o grupo galego, que presentará resultados o vindeiro 10 de xuño, hase enfrontar aos datos máis baixos do presente exercicio fiscal pola "complicada" conxuntura actual". "O crecemento das vendas estará por baixo do 7%", estimaron as mesmas fontes, que apuntaron que a compañía xa anunciara que ha concentrar a maior parte das súas aperturas no segundo semestre do ano. A xuízo de Fortis, o nomeamento de Ignacio Fernández, até o de agora director do departamento de Asesoría Fiscal, como novo director xeral de Finanzas do grupo téxtil, tamén pode influír no comportamento do valor, aínda que no caso de Inditex o peso específico da compañía recae sobre o vicepresidente e conselleiro delegado, Pablo Isla.

Pola súa banda, o analista de Renda 4 Iván San Félix coincidiu en que os resultados dos tres primeiros meses seguirán reflectindo "moderación" no crecemento, en liña coa tendencia dos últimos trimestres. San Félix tamén considerou que o comportamento da compañía que preside Amancio Ortega é "relativamente bo para o mal que está o mercado".

Porén, malia a baixada rexistrada na sesión da segunda feira, a maior do Ibex, as accións de Inditex mantiveron unha liña ascendente e revalorizáronse un 14% dende a presentación dos resultados do último exercicio o pasado 25 de marzo.


4.5/5 (2 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: