Vieiros

Os tres sindicatos que convocaron a folga do sector do metal para os días 20 e 21 deste mes anunciaron este martes que actuarán de xeito conxunto durante as dúas xornadas de folga nas que está prevista a participación duns 27 mil traballadores. O anuncio feito por CC.OO, UXT e CIG chega unha semana despois de que Comisións Obreiras declarara rota a unidade sindical por diferenzas coa Central Intersindical Galega sobre unhas reivindicacións feitas no sector da construción naval a semana pasada. Os sindicatos anunciaron a súa determinación despois de xuntarse coa intención de debater a estratexia de acción para os dous días de folga.

Os representantes das centrais sindicais anunciaron que decidiron "aparcar as súas diferenzas" ao recoñecer que a negociación do convenio colectivo "é máis importante" que as súas diferenzas, tal e como dixo Henrique Pérez, falando en nome da CIG. O representante de UXT, Diego Atanes, confirmou que "non haberá diferencias" respecto a folgas do metal anteriores e manterán a acción conxunta. Pola súa parte o portavoz de CC.OO, Ramón Sarmiento, explicou que a unidade débese a que os tres sindicatos coinciden en puntos básicos da negociación do convenio, como son: regulación da xornada, incremento salarial e vixencia dun ano.