Vieiros

A sala segunda do Tribunal Constitucional español admitiu na tardiña desta terza feira a trámite o recurso presentado por Iniciativa Internacionalista contra a anulación da súa candidatura electoral europea, ditada polo Tribunal Supremo. O Constitucional, reunido dende a mañá, resolveu admitir o recurso e deulle un día de prazo á fiscalía e ao goberno español para que poidan presentar as alegacións pertinentes.

O TC debe decidir sobre o recurso antes da media noite desta quinta feira, cando comezará a campaña electoral dos comicios europeos do vindeiro 7 de xuño. O recurso presentado por esta coalición condena a violencia "para obter obxectivos políticos no marco dun Estado democrático", e proclama que nunca empregou medios "que non fosen estritamente políticos" no seu traballo, e que o emprego da violencia non ten a ver co seu xeito de actuar.

Acto en Galiza contra a ilegalización
Na quinta feira, antes de que o TC dite sentenza, celebrarase un acto público no que diversas organizacións políticas, sindicais e sociais, entre elas a FPG -que fai parte da candidatura de Iniciativa Internacionalista-, amosarán o seu rexeitamento á ilegalización da candidatura ca que esta coalación concorre aos comicios europeos.

O acto desenvolverase no IES Santa Irene, na cidade de Vigo, a partir das 20h00. Alén disto, na rede circula, dende a pasada sexta feira, cando o Tribunal Superior decidiu ilegalizar a candidatura, un manifesto de apoio.