Vieiros

Vieiros de meu Perfil


Máis Alá

Xestionado por Vieiros
RSS de Máis Alá
XIRARÍA POR TODA EUROPA

O CCG proponlle a Feijoo unha grande exposición sobre Xelmírez no Xacobeo

Entregaralle á Xunta este mércores o informe que o presidente lle solicitou cando visitou a institución antes de ser investido.

Redacción - 11:30 20/05/2009

O Plenario do Consello da Cultura Galega aprobou este martes a proposta de actividades para o Xacobeo 2010, logo da petición formulada polo Presidente da Xunta a finais de marzo. Nesta sesión incorporouse ao Plenario o titular da Consellería de Cultura, Roberto Varela Fariña.

No informe destaca a proposta de realizar unha exposición de grande impacto, de ámbito europeo, que permita difundir Galiza, a través do fenómeno Xacobeo, en lugares importantes da cultura europea. O CCG propón que esta exposición se centre no tempo e na figura de Diego Xelmírez. O informe tamén recomenda accións específicas pensadas para intercalar no treito que separará o 2010 do seguinte Ano Xubilar (2021).

Polo demais, tamén se aconsella a organización dunha oferta de arte actual, centrada en Compostela e en puntos significativos da xeografía galega, que permita completar o feito xacobeo cunha mirada concibida desde as tendencias artísticas do presente. Así mesmo, xunto con estas liñas xerais, a proposta suxire o desenvolvemento de estratexias complementarias "para unha axeitada planificación das actividades do 2010 e para a súa mellor difusión". Entre elas, o Consello fai fincapé no obxectivo de consolidar novos públicos que, procedentes de países nos que o fenómeno xacobeo acadou unha importante presenza, poidan incorporarse de forma plena á tradición das peregrinacións xacobeas, como Brasil, Estados Unidos ou os países da Europa oriental e báltica.


5/5 (1 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: