Vieiros

Logo de que nos últimos meses os medios recollesen informacións vencelladas con supostas irrgularidades por parte dalgún sindicato ou organización que traballa con inmigrantes (como acontecía hai uns días coa CIG e hai uns meses con CCOO), este colectivo arreponse contra este tipo de prácticas. En concreto, son a Federación de Asociacións Veciñais "Eduardo Chao" de Vigo (FAVEC), Galicia Acolle e o Instituto Galego de Xestión para o Terceiro Sector (Igaxés-3), quen fixo público un comunicado no que defenden a legalidade na que desenvolven as súas actividades.

Así, no escrito rexeitan "calquera declaración ou manifestación pública que afirme ou insinúe que as organizacións de apoio á poboación de orixe estranxeira en situación administrativa irregular en ocasións recorren a prácticas ilícitas para o desenvolvemento do seu traballo diario".

Limitacións da lexislación
Estes colectivos engaden, non obstante, que do mesmo xeito queren "manter unha actitude crítica e propositiva ante as limitacións da propia lexislación vixente". De todos os xeitos, aseguran que entenden que a súa actividade "debe ser canalizada a través dos cauces de participación política e cidadá que determina a lei". Así as cousas, tamén queren expresar o seu apoio "a calquera persoa ou colectivo que no exercicio dos principios de solidariedade e de defensa dos Dereitos Humanos actúe en beneficio de quen se atope en situación vulnerábel".