Vieiros

Vieiros de meu Perfil


Edición xeral

RSS de Edición xeral
Galiza, século XXI

Telecomunicacións no rural: Santa Comba–Compostela, vía Berna

Un lector de Vieiros residente en Suíza denuncia que os veciños da parroquia de Esternande, entre estes a súa nai, pasaron os últimos oito días sen liña telefónica.

F. Arrizado - 08:00 18/06/2009
Non todos en Galiza teñen liña

Non todos en Galiza teñen liña

"Hai un par de anos cambiáronlle o TRAC vello por outro novo, o TRAC dixital chámanlle, pero segue sen funcionar ben, e a conexión á internet é de velocidade mínima".

Xosé Manuel, lector de Vieiros residente en Biel (Berna, Suíza), fala da súa nai, Rosalía, e do famoso -por infame- sistema sen fíos Telefonía Rural por Acceso Celular, que Telefónica ideou para levar a liña do teléfono ao rural sen necesidade de facer a instalación de cables.

Rosalía e a maioría dos veciños da parroquia de Grixoa de Esternande, en Santa Comba (Xallas), pasaron os últimos oito días sen poderen facer ou recibir chamadas, aínda despois de facer a migración do sistema analóxico ao dixital que a multinacional española comezou a ofrecer hai catro anos.

De feito, esta veciña di que dende a mudanza a liña dá problemas cada 15 días. Navegar pola web segue a ser ciencia ficción. "Hai dous rapaces que teñen internet e quéixanse de que vai lento ou de que non vai. Teñen que ir até Santa Comba para facer os traballos da escola".

"Tanto din de quedar na aldea, pero obrígante a marchar", protesta Xosé Manuel, que moitas veces lle ten que xestionar as reclamacións á súa nai dende o país alpino porque a cobertura do móbil é tamén feble.

"Para cobrar a final de mes non fallan", asegura o de Esternande, unha parroquia na que, curiosamente, hai proxectada a construción dun gran parque eólico. Se as cousas non cambian, nuns meses han ter muíños mais non postes de teléfono.


4.63/5 (8 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: