Vieiros

Vieiros de meu Perfil


Canal Verde

Xestionado pola Federación Ecoloxista Galega e Vieiros
RSS de Canal Verde
Defensa do ambiente

Unha vila australiana prohibe a auga embotellada

A medida tamén serviu para protestar contra unha empresa que pretendía explotar un manancial na localidade.

Redacción - 10:15 12/07/2009
Cartel da convocatoria da xuntanza, que tivo lugar este mércores

Cartel da convocatoria da xuntanza, que tivo lugar este mércores

A vila de Bundanoon, situada no estado de Nova Gales do Sur, en Australia, votou por ampla maioría converterse no primeiro lugar do mundo en prohibir a auga embotellada. Veciños da localidade, de dous mil habitantes, tomaron a decisión a man alzada. A proposta partiu do empresario local Huw Kingston, que afirmou que só dúas das 400 persoas participantes na votación se opuxeron á medida.

Os comercios da vila terán prohibido vender e almacenar auga embotellada, mentres que na rúa principal instalaranse fontes de auga filtrada para que a xente poida encher as súas botellas. Aos visitantes aconsellaráselles, aínda que non se lles obrigará, a non consumir auga envasada.

O movemento produciuse cando a compañía Norlex Holdings anunciou os seus plans de explotar un manancial na vila, levar a auga en camións a Sydney e despois vendela de volta en botellas. Segundo conta o xornal británico Daily Telegraph, activistas na defensa do ambiente esperan que cunda o exemplo en Australia e que a xente pense dúas veces antes de mercar auga envasada. Calcúlase que no país austral gástanse arredor de 280 millóns de euros nese produto.

Os activistas afirman que a auga embotellada xera un uso innecesario do plástico e de combustíbel para o transporte. Segundo un estudo de 2006, a industria da auga ceibou 60 mil toneladas de gases de efecto invernadoiro. O novo goberno estatal de Nova Gales do Sur xa tomou exemplo da proposta e recomendoulles a todos os departamentos da súa administración usar auga da billa en vez de mercar botellas.


5/5 (5 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: