Vieiros

Vieiros de meu Perfil


Edición xeral

RSS de Edición xeral
“Sen ter en conta os intereses dos veciños”

Denuncian que o Concello de Negreira incumpre a Lei de Protección Animal ao organizar unha tourada na vila

A plataforma Galicia, Mellor Sen Touradas organiza unha concentración para este sábado, a carón da praza de touros portátil contratada para as festas deste municipio.

Redacción - 13:30 09/07/2009
Camisola das festas de verán de Negreira, feita pola asociación de festexos

Camisola das festas de verán de Negreira, feita pola asociación de festexos

A plataforma Galicia, Mellor Sen Touradas denuncia un "novo intento" do Concello de Negreira (A Barcala) e da asociación de festexos da vila de organizar "outro festexo taurino", a pesar, contan "de que en setembro do ano pasado só conseguiron encher a metade do aforo da praza de touros portátil".

Desta volta, o acto, que está organizado para o vindeiro sábado 11 de xullo, e trátase dunha "capea", que en terminoloxía taurina é a lidia de becerros ou xatos, feita por amadores.

Dende a plataforma consideran "moi negativo" que a corporación municipal "non teña en conta os intereses dos veciños e veciñas", e decidan destinar cartos a "maltratar animais, e non á organización dunhas festas aptas para todos os públicos". Ademais, critican que Negreira siga incumprindo a Lei de Protección Animal, ao promover "espectáculos onde seres vivos son torturados".

Por isto, dende a plataforma Galicia, Mellor Sen Touradas convocan a "todas as persoas preocupadas polo maltrato animal" a acudir á unha concentración que organizaron o mesmo sábado 11 de xullo ás 16h00 na Pedra Mámoa, a carón do campo de fútbol de Negreira.

O Concello de Negreira critica que os antitaurinos non denuncien as Rapas das Bestas
Porén, o concelleiro de Cultura e Medio Ambiente de Negreira, Jorge Tuñas, sinalou que nas capeas organizadas desde 2008 polo concello "non se lle dá morte" a ningún animal. Tamén lembrou que houbo un "intercambio de opinións" entre o concello e a asociación antitaurina, e que se lles garantiu o seu dereito a celebrar a manifestación.

Tuñas tamén manifestou, respecto de Galicia, Mellor Sen Touradas, que "non comprende o distinto modo de tratar aos distintos concellos e eventos", e puxo como exemplo a recente celebración de Rapa das Bestas' en Sabucedo, no municipio da Estrada (Tabeirós-Terras de Montes), onde, ao seu xuízo, "si se deu malos tratos animais" e a plataforma non estivo presente.


5/5 (2 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: