Vieiros

A segunda volta da XXVII edición da Bandeira de Moaña, que puntúa na Liga San Miguel, dispútase este sábado e domingo no concello do Morrazo. Será a última parada en Galiza das embarcacións que participarán na competición organizada pola Asociación de Clubs de Traíñas (ACT).

As doce mellores tripulacións comezarán a vogar ás 18.00 horas do sábado polo Gran Premio Ría de Vigo, e polos 22.500 euros en premios con que está dotada a proba. O domingo ao mediodía será a quenda do Gran Premio Fandicosta, regata que tamén repartirá 22.500 euros en premios.

Ambas as dúas serán puntuábeis para a clasificación xeral da Liga San Miguel, mais o vencedor da Bandeira do Concello de Moaña, que se presentou este mércores no Hotel Benestar da localidade, decidirase computando os tempos das dúas xornadas. A regata retransmitirase en directo pola TVG (e pola EiTB vasca).