Vieiros

Vieiros de meu Perfil


Edición xeral

RSS de Edición xeral
Caixas de aforro

Antes da fusión, "democratización"

Adicae advirte da falta de transparencia, funcionamento obsoleto e escasa democracia interna das entidades, e reclama un cambio lexislativo.

Redacción - 17:15 27/07/2009
Moreda e Gayoso, protagonistas do último cruce de declaracións a prol e en contra da fusión Caixa Galicia - Caixanova

Moreda e Gayoso, protagonistas do último cruce de declaracións a prol e en contra da fusión Caixa Galicia - Caixanova

A democratización do funcionamento das caixas de aforros é a necesidade máis urxente das entidades, segundo subliñan desde a Asociación de Consumidores e Usuarios de Bancos, Caixas e Seguros (Adicae). Tal é o recordatorio que fan aproveitando a actualidade ao respecto das entidades e a posibilidade de fusión entre Caixa Galicia e Caixanova. Para Adicae, a prioridade inmediata é a modificación da lei galega de caixas, especialmente no relativo á elección dos conselleiros e o papel dos clientes nos órganos de goberno das entidades.

Falan desde este colectivo dunha grave situación nas entidades, que atribúen ao seu funcionamento obsoleto, falta de transparencia e problemas de sectarismo interno. "Están escasamente democratizadas", láianse. A asociación ten cita este martes con Nava Castro, directora xeral de Comercio e nova presidenta do Instituto Galego de Consumo, e a quen lle expoñerán as suxestións da Adicae.

Democratización e control interno
Polo miúdo, o colectivo propón que se estabeleza unha mínima representación de entidades sociais e cidadáns que "garanta unha representatividade auténtica dos impositores usuarios que sirva de cautela para evitar operacións financeiras dubidosas". Así por exemplo, reclaman a obriga de que as asociacións de consumidores poidan ter voz na actividade das entidades.

En segundo lugar falan da supresión dos sistemas electorais internos que cualifican de "pre-constitucionais" para a elección de representantes nos órganos de goberno. Advirten así da necesidade de criterios que impidan a fraude e o dominio das entidades "por determinados grupos de interese".

De forma concreta, suxiren crear unha comisión electoral de control "independente" que organice e vixíe os procesos electorais das caixas. Tamén sosteñen que os Conselleiros Xenerais non deberan ser escollidos exclusivamente entre os compromisarios. A maiores, subliñan a necesidade de que un mínimo do 50% dos beneficios sexa adicado á obra benéfico-social "reinvestindo beneficios para emprego e infraestruturas en Galiza, como expresión do cumprimento da súa única función: motores galegos económicos e sociais". Por último, queren que as caixas se adhiran ao sistema arbitral de Consumo como mecanismo de resolución de conflitos.


0/5 (0 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: