Vieiros

Os parados que xa esgotasen o cobro do paro e non dispoñan de ingresos beneficiaranse desta axuda de 420 euros mensuais. Así o anunciou o ministro de Traballo e Inmigración, Celestino Corbacho, quen estimou que a medida beneficiará a un total de 300 mil persoas. Poderán percibir esta cantidade durante un período de seis meses, evitando así, segundo o ministro que "queden desamparados dende o punto de vista da protección social".

O beneficiario da renda, a cambio, asumirá o compromiso co servizo público de emprego de participar nun itinerario de formación e emprego. O obxectivo desta iniciativa, dixo, "non é o de crear un subsidio, senón o de dar unha renda de protección para que as persoas que a reciban teñan acceso a unha formación e poidan volver ao emprego canto antes".

A permanencia desta medida, que se aprobará este xoves en Consello de Ministros, estará condicionada á evolución do paro e das condicións económicas, polo que, malia que os perceptores só recibirán a axuda durante seis meses, podería permanecer en vigor durante máis tempo. O seu custo ascende aos 400 millóns de euros, que correrán a cargo do Servizo Público de Emprego e aos Orzamentos Xerais do Estado.

O ministro de Traballo recoñeceu que as marxes de manobra do goberno español cada vez van sendo menores "como é natural e lóxico". Con todo, precisou que o executivo aínda ten capacidade de reacción, aínda que esta sexa menor da que dispoñía hai un ano, "cando o Estado tiña superavit e a súa débeda representaba a metade de media Europa".