Vieiros

Os centros de estudos galegos nas universidades de fóra de Galiza recibirán un total de 331 mil euros para darlle "un novo pulo", segundo adiantou a Secretaría Xeral de Política Lingüística. O obxectivo é promover o ensino da lingua e da cultura galega en distintos centros universitarios do mundo, para o que se renovarán os convenios de colaboración que permiten contar cunha rede de lectorados no exterior.

Dende Türbingen até Lisboa
A previsión é que se asinen estes convenios coas universidades de Barcelona, Tübingen, Bahía, Wales, Oxford ou Lisboa. Deste xeito, as universidades ofertarán a aprendizaxe de materias de lingua e cultura galegas ao alumnado e organizarán actividades que permitan dar a coñecer nos diferentes países de acollida a lingua e a cultura galegas.

Asemade, fomentarase o desenvolvemento de traballos de investigación sobre o galego e achegarase material bibliográfico aos diferentes centros.

Novos lectores e maior eficiencia do sistema
Política Lingüística tamén informa que na vindeira semana se resolverá o proceso mediante o cal se procederá á escolla dos novos lectores de galego no estranxeiro. Tanto a Secretaría Xeral como a Consellaría de Educación desenvolveron nos pasados días o proceso de selección para dotar de lectores de lingua galega a estas universidades coas que se renovarán os convenios.

O obxectivo que se marca este departamento, dirixido por Anxo Lorenzo, é poñer en marcha unha "rede de lectorados, que permita favorecer a actuación coordinada das actividades no exterior". O propósito é que a xestión dos recursos sexa "máis eficiente" e poida así "multiplicarse a visibilidade e o interese pola nosa lingua".

Relacionadas:

• O BNG admite erros e promete batalla social na defensa da lingua
• 'Queremos Galego' chama tamén os votantes do PP