Vieiros

Vieiros de meu Perfil


Edición xeral

RSS de Edición xeral
MEDIO AMBIENTE

A legalidade da planta acuícola de Touriñán debaterase en Europa

O PSdeG rexistra unha pregunta no Parlamento Europeo sobre a compatibilidade do proxecto coa protección ambiental da Rede Natura.

Redacción - 17:30 19/09/2009
A recuperación do proxecto de Touriñán foi rexeitado tanto polos partidos da oposición como por todos os colectivos ecoloxistas

A recuperación do proxecto de Touriñán foi rexeitado tanto polos partidos da oposición como por todos os colectivos ecoloxistas

Europa deberá pronunciarse sobre a construción da piscifactoría proxectada por Pescanova en Touriñán. Así terá que ser logo de que o PSdeG rexistrase, da man do seu deputado, Antolín Sánchez Presedo, unha pregunta sobre a compatibilidade do proxecto acuícola previsto en Muxía coa protección ambiental da Rede Natura.

Os socialistas apuntan que o seu obxectivo é coñecer a postura do goberno comunitario, a quen lle achegan un informe da Consellaría do Mar que recolle a recomendación de modificar o Plan Galego de Acuicultura de 2008 (aprobado polo bipartito) para incluír a posibilidade de realizar actividades acuícolas na zona. Ademais, Sánchez Presedo pregunta se o anuncio deste proxecto "sen previa avaliación" pode supoñer o incumprimento das obrigas europeas e se están demostradas "as razóns imperiosas de interese público de primeira orde para materializar a decisión da Xunta".

Para non regalarlle Touriñán á empresa privada
Asemade, o deputado socialista alerta sobre o impacto ambiental que esta infraestrutura terá sobre o entorno, parte da Rede Natura, xa que "está constatado que as actividades industriais deste tipo inciden sobre o medio e os ecosistemas". Así, cuestiona as palabras de Núñez Feijoo nas que aseguraba que se impediría a actividade deste tipo en zonas como Laxe Brava, Merexo, Seiruga e Xandriña e pregunta en que basea o diferente xeito de proceder con respecto a Touriñán.

O socialistas preguntan á Comisión Europea se a actividade industrial é compatíbel coa protección do cabo e se lle consta que a Xunta realizase previamente a avaliación de repercusión prevista pola Directiva 92/43 da CEE. Do mesmo xeito, cuestionan se o anuncio deste proxecto sen previa avaliación pode supoñer un incumprimento das obrigas da directiva. O PSdeG sinala, finalmente, que esta actuación ante o goberno comunitario se enmarca nunha serie de accións que adoptarán ante as diferentes institucións para "evitar regalarlle Cabo Touriñán a unha empresa".


5/5 (8 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: