Vieiros

Vieiros de meu Perfil


Edición xeral

RSS de Edición xeral
GAZA

Israel priva os palestinos de auga potábel

Amnistía Internacional (AI) denuncia nun informe o bloqueo e control total sobre os recursos hídricos.

Redacción - 12:00 27/10/2009
Os israelís reciben 300 litros de auga diarios, mentres que os palestinos non superan os 70 litros ao día

Os israelís reciben 300 litros de auga diarios, mentres que os palestinos non superan os 70 litros ao día

O consumo diario de auga dos israelís en Cisxordania é catro veces superior ao dos palestinos, unha situación que obedece ao bloqueo dos recursos hídricos por parte dos primeiros. Isto é o que denuncia a organización de defensa dos dereitos humanos, Amnistía Internacional (AI). Nun elaborado informe, acusan a Israel de impedirlles o acceso á auga potábel e de manter un control total sobre os recursos compartidos, de tal xeito que "levaron as infraestruturas hídricas e os sumidoiros a un punto crítico".

En cifras exactas, os israelís reciben 300 litros de auga diarios, mentres que os palestinos non superan os 70 litros ao día. Ademais, segundo o informe, algúns palestinos das áreas rurais apenas reciben 20 litros ao día, o mínimo recomendado mesmo en situacións de emerxencia humanitaria. Pola contra, as autoridades israelís afirman que estes datos son falsos e aseguran que os palestinos teñen acceso a máis auga da prevista no acordo de paz de Oslo (1993).

Auga contaminada
Doutra banda, AI informa de que neste territorio palestino, entre o 90% e o 95% da auga provén dun único acuífero, que está contaminado e non é apto para o consumo humano. Con todo, Israel non permite a transferencia de auga dende Cisxordania. Ademais, os palestinos non teñen acceso tampouco a materiais de construción que lle permita escavar pozos e os seus depósitos de auga foron comisados. Pola súa parte, os colonos israelís contan con "explotacións de regadío intensivo, xardíns frondosos e piscinas", di AI.

En contestación, o portavoz do goberno israelí, Mark Regev, acusou aos palestinos de xestionar mal a auga e asegura que os datos do informe son inexactos. Nesta liña, tamén negou que o seu goberno estea impedindo a construción de pozos.


5/5 (3 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: