Vieiros

O director xeral de Educación, Formación Profesional e Innovación Educativa, Xosé Luís Mira Lema, felicitouse do incremento de alumnos matriculados este ano nas Escolas Oficiais de Idiomas (foron 4.239 máis) ao tempo que cualificou como "xestión ineficaz" a do anterior Goberno. Se ben recoñeceu a redución do número de docentes (27 interinos menos), considerou que esta situación se contrarresta coa "ampliación do seu horario en 18 horas lectivas, pasando a dar clase a catro grupos".

En resposta ás críticas, peches e manifestacións do profesorado destes centros, Mira Lema recoñece que "é certo que se reduciron grupos nas franxas horarias máis demandadas", se ben aclarou que "a ocupación representa actualmente un 46% pola mañá e pola tarde e un 57,6% pola noite". Nesta liña asegurou que "temos unha oferta educativa suficiente" e que os cambios obedecen a unha nova política que pretender "facer un uso responsábel dos recursos sen mermar a calidade do ensino".

"Campaña contra os alumnos"
O director xeral de Educación acusou tamén aos responsábeis das EOI e aos sindicatos de "osquestrar unha campaña contra os alumnos", ao celebrar unha folga "durante o período de matrícula". Culpounos de falta de responsabilidade e de estaren "politizados". Así, rexeitou que se estea a producir un "desmantelamento do ensino público" e adiantou que a Inspeccion Educativa realizará un "seguimento para vixiar o uso eficiente dos recursos".