Vieiros

Case 300 mil cidadáns teñen dereito ao sufraxio nas eleccións que se celebran este domingo en Guinea Ecuatorial, os cuartos comicios presidenciais pluripartidistas na historia do país. O presidente ecuatoguineano, Teodoro Obiang, candidato do Partido Democrático de Guinea Ecuatorial (PDGE), aspira a renovar un terceiro mandato de sete anos, logo de que chegase ao poder cun golpe de estado en 1979.

O resto dos candidatos son Plácido Micó Abogo, por Converxencia Para a Democracia social (CPDS); Buenaventura Monsuy Asumu, da Coalición Socialdemócrata Baboro (PCSD); Achivaldo Biribé, de Unión Popular (UP); e Carmelo Mbá, de Acción Popular (AP).

A riqueza do petróleo
Con todo, os antecedentes deixan pouco espazo para a dúbida sobre os resultados finais. Nas eleccións de 2002, Obiang obtivo a vitoria co 97,1% dos votos e o seu partido arrasou nos comicios de 2004 e 2008, nos que conseguiu o 98% e o 99% dos escanos, respectivamente. A comezos deste mes, o opositor Plácido Micó enviou unha carta ao presidente dos Estados Unidos, Barack Obama, na que advertía de que Obiang leva 30 anos no poder grazas "ao fraude sistemático nas eleccións".

Pola súa parte, o presidente xa adiantou nun mitin que gañaría con "máis do 97% dos votos" e prometeu que en 2020 Guinea Ecuatorial deixará de ser un país subdesenvolvido e que se situará "á altura dos máis avanzados". Non hai que esquecer, que Guinea é o terceiro país produtor de petróleo da África Subsahariana, por detrás de Angola e Nixeria. De feito, varias organizacións nacionais e internacionais acusaron o réxime de manter a pobreza nnha alta porcentaxe da poboación, malia os altos beneficios do petróleo.