Vieiros

Vieiros de meu Perfil


Edición xeral

RSS de Edición xeral
UNIVERSIDADE DE VIGO

Mato preséntase a reitor apelando á "cooperación intelixente" entre as universidades

O candidato de Alternativa Universitaria, plataforma que leva 12 anos gobernando, asegura que a austeridade non pode comprometer a competitividade dos centros.

Redacción - 09:30 13/01/2010
Salustiano Mato será o candidato a reitor de Alternativa Universitaria

Salustiano Mato será o candidato a reitor de Alternativa Universitaria

O catedrático en Zooloxía e ex-director xeral de I+D+i da Xunta de Galiza, Salustiano Mato, presentou oficialmente este martes a súa candidatura á reitoría da Universidade de Vigo como representante da plataforma Alternativa Universitaria.

Mato, que presentará o seu programa e equipo reitoral en marzo, adiantou que o seu obxectivo será o de "achegar a institución á sociedade e poñela ao servizo do desenvolvemento económico e do benestar social dos cidadáns". Ademais, amosouse como un defensor da "cooperación intelixente" como "vía para aumentar os horizontes das universidades galegas" e apelou ao traballo conxunto entre as diferentes universidades como "a mellor estratexia de crecemento nunha conxuntura de crise económica".

Se ben asumiu que a austeridade "debe presidir" a forma de gobernar do futuro reitor, o candidato precisou que ese factor "non pode atenazarnos" á hora de descubrir "novas posibilidades de futuro". Asemade, asegurou que competitividade dos tres centros galegos é positiva "se existe a colaboración suficiente para gañar todos".

No máis concreto, Salustiano Mato apuntou á creación dun Campus do Mar, a política de investigación, a captación de alumnado, a confección estratéxica dun novo mapa de titulacións e a igualdade de oportunidades para todos os membros da comunidade universitaria como os piares do programa que se dará a coñecer en dous meses.


5/5 (5 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: