Vieiros

Vieiros de meu Perfil


Máis Alá

Xestionado por Vieiros
RSS de Máis Alá
"Fardel da nosa memoria histórica"

O Consello da Cultura manifesta a súa "preocupación" polo futuro do legado cultural de Isaac Díaz Pardo

Entende que debe ser "acollido, preservado, protexido e posto en valor ao servizo de Galiza".

Redacción - 18:05 14/01/2010

A Comisión Executiva do Consello da Cultura Galega expresou a súa "preocupación" polo futuro do importante legado cultural recuperado e reunido durante anos por Isaac Díaz Pardo no Museo Carlos Maside, no Seminario de Sargadelos e no Seminario de Estudos Galegos.

Un legado que, segundo manifestou o Consello, constitúe "un quiñón esencial do patrimonio cultural colectivo de Galiza, fardel da nosa memoria histórica e prenda de transmisión de moitos dos nosos devanceiros á posteridade".

A institución, encargada de defender e promover os valores culturais do noso pobo, entende que "todo ese legado debe ser acollido, preservado, protexido e posto en valor ao servizo de Galiza".

Ao respecto, lamentou que non se concluíron as tarefas de ordenación e dixitalización do material conservado no Instituto Galego da Información, levadas a cabo ao abeiro dun convenio asinado co Consello e co Seminario de Estudos Galegos.

Asemade, a Comisión Executiva expresou a súa "solidariedade" con Isaac Díaz Pardo e o "recoñecemento institucional a quen sen dúbida é unha figura senlleira da cultura galega".


5/5 (4 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: