Vieiros

A NASA está a publicar na web imaxes de alta resolución da superficie de Marte tiradas pola sonda Mars Reconnaissance Orbiter. As fotografías en moitos casos amosan paisaxes insólitas e moi afastadas do que se presupón un enorme deserto vermello.

Agora, coa colaboración da Universidade de Arizona, a axencia espacial estadounidense fixo un chamamento aos internautas para que suxiran que zonas do planeta se van fotografar. Dun xeito participativo, os usuarios da web poden facer peticións e suxestións sobre as próximas tomas, unha vez se recompilaron xa máis de 13 mil imaxes.

A edición dixital de Wired fixo unha escolma dalgunhas das imaxes máis sorprendentes da superficie marciana, que amosan cráteres ou dunas de formas e cores sorprendentes.