Vieiros

O Gatañal vibrará esta fin de semana para presenciar un dos encontros máis agradados da Liga Asobal: o derbi que enfrontará ao Pilotes Posada e o Frigoríficos do Morrazo. Mais, aqueles que non poidan achegarse até Cangas non poderán ver o desenlace do choque deportivo, que será moi importante para a permanencia na categoría dos dous conxuntos galegos.

A Televisión de Galiza desbotou a retransmisión do partido, malia as facilidades que lle ofreceron ambos os dous equipos. As dúas directivas propuxeron a emisión de balde e mesmo estaban dispostos a xogar o encontro ben o venres, ben o sábado, ben o domingo, cando mellor lle acaese na grella á canle televisiva. É máis, tanto o Pilotes como o Frigoríficos estaban dispostos a asumir o pago da correspondente indemnización á Liga Asobal de tres mil euros, xa que os dereitos deportivos foron vendidos no seu momento a Teledeporte e Sportmanía. Con todo, dende a CRTVG contestaron que xa tiñan a programación pechada e non tiñan oco, nin na súa primeira nin na súa segunda canle, para o partido de balonmán.