Vieiros

O escritor Xosé Neira Vilas foi galardoado este martes co Premio Laxeiro 2010 pola súa traxectoria literaria e por ser, segundo destacou o conselleiro de Cultura, Roberto Varela, "un dos grandes nomes" da cultura do país e "un referente literario, intelectual e, sobre todo, humano".

Varela asistiu en Vigo á reunión do Padroado da Fundación Laxeiro, que acordou dar un impulso á proxección internacional da figura do pintor durante 2010, e participou no acto de concesión desta distinción, durante a que incidiu nas afinidades do galardoado co propio Laxeiro.

O conselleiro valorou o "don extraordinario" que ambos os dous tiñan para "repropoñer" a tradición cultural galega en "formas aparentemente simples e inmediatamente comunicativas". Ademais, puxo de relevo a súa capacidade para ser creadores "verdadeira e sentidamente populares".

Varela recordou que os dous artistas se coñeceron no Centro Galego de Bos Aires e foron emigrantes, o que tamén lles serviu "de axuda" no seu quefacer creativo e permitiulles percibir a necesidade de "reinterpretar continuamente a tradición", entendendo así que "a identidade dun pobo se refunda cada día a través da lingua e da arte".

A Fundación Laxeiro
Durante a súa intervención na entrega do sétimo Premio Laxeiro, o titular de Cultura tamén subliñou o "impulso decisivo" que proporciona á promoción do patrimonio do país a Fundación que leva o nome do pintor nacido en Lalín.

Entre os seus labores máis salientábeis está a recente publicación do catálogo universal do artista. Ao respecto, Varela sinalou que o propio Laxeiro era un "creador preocupado pola permanencia do seu legado".

• Entrevista: "En Bos Aires acabamos na comisaría por cantar en galego nun bus" (04/12/2007)