Vieiros

Vieiros de meu Perfil


Edición xeral

RSS de Edición xeral
Conflito armado

"A guerra en Darfur rematou", segundo o presidente sudanés

O Goberno e o principal grupo rebelde, o JEM, e asinaron un acordo, porén o SLM -outra guerrilla- critica a suposta paz.

Redacción - 10:00 25/02/2010

"A crise en Darfur acabou, a guerra de Darfur rematou. Darfur está agora en paz", asegurou esta cuarta feira o presidente do Sudán, Omar Al Bashir, un día despois de asinar un acordo co principal grupo rebelde.

A rexión é escenario dunha guerra civil desde 2003, na que morreron 300 mil persoas, segundo os cálculos da ONU, 10 mil, segundo Khartum. Uns 2,7 millóns de persoas víronse desprazadas.

O Movemento para a Xustiza e a Igualdade (JEM, siglas en inglés polas que é coñecido) asinou o martes en Qatar un acordo político co goberno de Sudán, que prevé un cesamento do fogo e a rúbrica dunha "paz definitiva" de aquí ao 15 de marzo.

"O combate das armas rematou, comeza o do desenvolvemento", engadiu o presidente, sobre o que pesa unha orde de arresto do Tribunal Penal Internacional (TPI) por crimes de guerra e crimes contra a humanidade en Darfur.

Xusto despois do acordo, as autoridades sudanesas liberaron este mércores 57 membros do JEM, que foran detidos logo dun ataque en maio de 2008 contra a cidade de Omdurman.

Críticas do SLM
Con todo, outro grupo rebelde da rexión, o Exército/Movemento de Liberación de Sudán (SLM, siglas en inglés polas que é coñecido) que lidera Abdul Wahid Al Nur, criticou o acordo.

"De que paz se trata? Dunha paz testemuñal, dun combate para obter postos no goberno, mais que non se interesa polo fundamental: garantir a seguridade da poboación" de Darfur, declarou ás axencias internacionais.


3,5/5 (2 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: