Vieiros

O informe As dez crises humanitarias máis desatendidas de 2009, publicado este venres por Médicos Sen Fronteiras (MSF), lembra que, "un ano máis", a comunidade internacional "volveu ignorar, ou foi incapaz de dar resposta, ao sufrimento de millóns de enfermos esquecidos e de civís acosados pola violencia en todo o mundo".

Milleiros de persoas morren cada día a consecuencia de enfermidades. Desde MSF, sinalan que, ao non afectar estas o mundo desenvolvido, non son negocio, nin os seus pacientes un mercado rendíbel, a investigación e desenvolvemento de novos tratamentos e métodos de diagnóstico non recibe o apoio económico necesario.
 
Ademais, din, que aínda que noutras ocasións, os medicamentos existen, os enfermos non teñen acceso a eles. "Só a malaria, a sida infantil, a tuberculose, a doenza do sono, a Chagas e a kala-azar cobran cada día oito mil vidas", destacan.

"Todas estas son crises desatendidas que provocan mortes na súa maioría evitábeis, e a pesar do devastador impacto que teñen nos países pobres, non vemos na comunidade internacional a mesma determinación demostrada en frontes como o da Gripe A", apunta a delegada de MSF para o noroeste do Estado, María Díaz.

O informe de MSF denuncia, ademais, a situación dos centos de miles de civís que ficaron atrapados en conflitos esquecidos como Paquistán, Sri Lanka, Afganistán, Somalia, Sudán ou República Democrática do Congo (RDC), onde a violencia foi indiscriminada, cando non expresamente dirixida contra a poboación. E tamén contra as organizacións humanitarias.

"A poboación civil no só é vítima dos conflitos, senón que ademais se remata a xogada impedindo que reciba asistencia de emerxencia, ben deixándoa atrapada en zona de combate, ben bloqueando o acceso á mesma das organizacións humanitarias", sinala Díaz.

"Esta inaceptábel dinámica estase a converter na norma", engade, lembrando que, en Kivu Norte (RDC), a axuda humanitaria chegou incluso a ser utilizada como cebo, ao atacar o Exército congolés os emprazamentos onde MSF estaba a desenvolver unha campaña de vacinación contra o sarampelo, e nos que había congregadas miles de persoas".

Crises esquecidas desde 1998
MSF comezou a publicar a lista d'As Dez Crises Máis Desatendidas en 1998, logo de que a devastadora fame no sur de Sudán pasou desapercibida para os medios de comunicación. A lista non só fala do esquecemento mediático, tamén do político, e baséase nos contextos en que MSF presta asistencia. A orde en que aparecen as crises no informe non constitúe unha valoración do seu nivel de gravidade.

• 'As dez crises humanitarias máis desatendidas de 2009' (.pdf / en castelán)