Vieiros

O parlamentario do PSdeG Xosé Manuel Lage propuxo que os altos cargos da Xunta e os membros do Parlamento "poñan á luz" o rendemento das súas actividades, tanto públicas como privadas, e que se poida acceder a eses datos a través da internet. O voceiro da Área Institucional do grupo socialista presentou unha iniciativa que insta o Goberno a presentar "en dous meses" un proxecto de lei que regule os bens e as actividades dos representantes públicos durante o seu exercicio e nos dous anos posteriores, para coñecer a evolución do seu patrimonio.

Lage Tuñas explicou que "a actividade pública significa estar debaixo do foco", e incidiu que é "voluntaria" e que debe levar consigo "vontade e compromiso" coa transparencia para acadar "a confianza da cidadanía". A proposta trata de "evitar susceptibilidades" e que as "irregularidades dalgúns" non fagan desmerecer a clase política, ao poder detectar se existe "colisión" entre a función pública e os intereses privados.

O parlamentario socialista quixo deixar claro que "non converte todos os cargos públicos en sospeitosos", senón que pretende "liberalos" dese prexuízo e demostrar que quen se dedica á política "non ten por obxecto o enriquecemento persoal". Tamén concluíu que é unha "proposición construtiva" e que pretende a "rexeneración democrática" e "maior transparencia".

Lage lembrou que o Tribunal Constitucional sentenciou que a publicación dos bens dos altos cargos non colide co dereito á intimidade e que a Xunta "non cumpre" a normativa de publicar as actividades dos seus directivos. Así, amosou un documento oficial onde non figura a actividade do conselleiro de Economía, Xavier Guerra, malia ser "un coñecido empresario". Aseguro, ademais, que este sistema está implantado en comunidades autónomas como Castela-A Mancha, Estremadura e Andalucía.