Vieiros

"Sabor para a túa lingua" é o lema co que naceu a Galicola. Tal e como anunciaran cando se botou adiante a iniciativa que puxo en tendas e bares do país a alternativa galega ao refresco global, os beneficios xerados, descontados os gastos de produción e distribución, irán para asociacións e colectivos que traballen en favor da lingua galega. Ademais, de xeito específico, o 5% dos ingresos brutos son destinados ao bautizado "fondo polo galego".

A Asociación Cultural Fontaira, promotora da Galicola, convocou con tal fin o concurso Ángelo Casal, convidando a todo tipo de entidades sen ánimo de lucro a que lles remitisen os seus proxectos de promoción lingüística. Cinco propostas foron recibidas: a Associaçom Cultural Foucelhas propón a construción dun centro social en Ordes; a Associaçom Galega da Língua (AGAL) solicita os fondos para a elaboración dun trivial en galego; a Escola Popular Galega requíreos para o financiamento da súa actividade educativa; o colectivo compostelán Gentalha do Pichel propón a actividade "24 horas en galego" e finalmente a Mocidade pola Lingua solicita os fondos para financiar a súa actividade.

Na web da Galicola hai información polo miúdo de cada unha destas iniciativas. As mellores serán escollidos por votación popular e o 17 de maio baleirarase a cantidade que haxa daquela no fondo para entregarlle os cartos ao mellor proxecto.