Vieiros

"As alegacións formuladas polo Parlamento en contra do recurso de inconstitucionalidade presentado polo goberno central contra a Lei galega de caixas foron elaboradas polos servizos xurídicos da Cámara", expoñía este domingo nunha nota oficial a presidenta da Cámara, Pilar Rojo. "Trátase, polo tanto, dun documento estritamente xurídico, que non foi sometido a ningún tipo de supervisión política", argumentaba.

De paso, Rojo aseguraba que os tres grupos parlamentarios recibiron a primeira hora do sábado copia das alegacións remitidas ao Tribunal Constitucional. Recorda a presidenta da institución ("para evitar calquera interpretación amnésica dos feitos", recolle o comunicado oficial), que tanto PP como PSOE e BNG estiveron de acordo, por unanimidade, na Mesa do Parlamento, coa decisión de presentar alegacións contra o recurso de inconstitucionalidade promovido polo goberno español contra a lei de caixas.

O PSOE cre que non se respectaron as normas do Parlamento
A posición da presidenta da Cámara foi criticada en conferencia de prensa polo vicesecretario da Mesa, o deputado socialista Ricardo Varela, quen afirmou que as alegacións foron realizadas despois dese acordo unánime e negou que o seu grupo tivese acceso a elas. De paso, Varela asegurou que o PSdeG non comparte a argumentación xurídica deseñada pola Cámara para solicitar a retirada do recurso e denunciou que os socialistas souberon desta por axencias. O modo de actuación da presidencia da Cámara con este asunto, queixouse o portavoz do PsdeGm "non foi respectuoso cos grupos e non favorece a autonomía e a fortaleza da oposición".