Vieiros

Vieiros de meu Perfil


Galego.org

Xestionado por Vieiros
RSS de Galego.org
Crítico coa normalización lingüística

O Valedor insiste en 'valerlle' preferentemente ao castelán

Non é a primeira vez que Benigno López despreza as políticas de normalización. Nunha rifa parlamentaria, PSdeG e BNG recórdanlle unha vez máis a normativa vixente.

Redacción - 10:35 23/03/2010
Benigno López, Valedor do Pobo

Benigno López, Valedor do Pobo

"A Galiza que vostedes defenden non ten nada que ver coa que sente a maioría", afirmaba este luns no Parlamento o Valedor do Pobo, Benigno López. Ben lonxe da diplomacia que se lle presupón a quen ostenta o seu cargo, López aínda engadiu, belixerante cara á representación do BNG na comisión parlamentaria: "Non poden ir poñéndolle unha pistola no peito a cada cidadán para que fale galego". "Se cadra vostedes veñen de profesións que non comprenden que alguén poida deixar a ideoloxía na casa", dixo Benigno López, reivindicando a súa experiencia de "trinta anos" no eido xudicial.

Non é a primeira vez que o Valedor se enfronta con nacionalistas e con socialistas na Cámara, fundamentalmente polo seu posicionamento acerca da lingua. En ocasións anteriores, expresou López a súa convicción de que, ao contrario do que indican todos os estudos e informes sobre normalización lingüística, o galego, na súa opinión, non corre risco ningún.

Para o portavoz na tarde deste luns do grupo parlamentario do BNG, Alfredo Suárez Canal, o informe do Valedor do Pobo presentado na Cámara "retrata unha realidade lingüística moi diferente á que padece Galiza". "O idioma que está en perigo neste país é o galego, non o castelán", lembroulle Suárez Canal ao Valedor. O deputado nacionalista reprochoulle especialmente a López a súa apelación á "liberdade do individuo por riba de calquera outra liberdade idiomática", e dixo non admitir a suposta "lección de liberdade do Valedor". Recordoulle o ex conselleiro do Bloque: "Algúns estivemos noa cadea por defender a liberdade, a idiomática e as demais tamén". En parecido sentido se pronunciou o voceiro do PSdeG, Francisco Cerviño, recordando os informes da Real Academia Galega ou do Consello da Cultura, e censurando a falta de compromiso do Valedor coa lingua do país.


1/5 (8 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: