Vieiros

Segundo informou a Xunta nun comunicado, a UE vai financiar a ampliación do vertedoiro de residuos perigosos de Cerceda. A decisión foi adoptada en base a un estudo de viabilidade encargado polo Goberno que determinou que a mellor opción para resolver a falta de espazo é ampliar a capacidade do vertedoiro.

O citado vertedoiro, contiguo á planta de tratamento e incineración de residuos da firma mixta Sogama, rexistrou numerosos problemas ambientais que provocaron a contaminación fluvial próxima, obrigando as autoridades a construír sistemas para o selar.

A auditoría técnica chegou á conclusión de que o vertedoiro tiña deficiencias na pendente dos noiros, prexudicando a estabilidade dos residuos, así como no control da separación dos mesmos, no funcionamento dos compresores, na rede de captación de gases e no transporte dos desperdicios.

Minimizar os riscos de contaminación
Sogama está "articulando un plan de explotación que permita a vertedura baixo estritas condicións de control, minimizando os riscos de contaminación" e para iso "procederá á separación efectiva do novo vaso respecto ao antigo mediante a colocación dunha barreira mineral artificial", sinala a Xunta.

Os traballos deberían permitir, segundo o comunicado, unha separación susceptíbel de "propiciar o control e a xestión independente" dos "gases xerados no depósito supraadxacente e das augas superficiais, supervisando en todo momento a calidade das augas subterráneas para evitar posíbeis afectacións ao medio".