Vieiros

Vieiros de meu Perfil


Edición xeral

RSS de Edición xeral
Acceso á Administración autonómica

A CIG rexeita a reforma da Función Pública aprobada pola Xunta de xeito "apresurado" e para "aparentar"

A Dirección Xeral reuniuse cos sindicatos este martes para os informar das modificacións introducidas ao funcionamento dos tribunais de selección.

Redacción - 11:00 21/04/2010
As denuncias foron abrollando

As denuncias foron abrollando

A CIG-Administración considera que a reforma da Función Pública, aprobada o 8 de abril polo Consello da Xunta, é unha reforma "apresurada, tendente a aparentar unha resposta diante da alarma social existente" logo das irregularidades detectadas no acceso á Administración autonómica.

Así llelo fixo saber o sindicato nacionalista aos representantes da Dirección Xeral da Función Pública, nunha xuntanza organizada este martes coas centrais e onde se informou polo miúdo da modificación das instrucións de abril de 2007 relativas ao funcionamento dos tribunais de selección.

O modelo defendido pola CIG, apuntan, pasa por -entre outras cousas- "despolitizar a designación dos membros dos tribunais", "revisar o modelo presidencialista", "recuperar a participación sindical" e "acadar un modelo homoxéneo de funcionamento para os procesos de persoal laboral e os de funcionario".

Convocada unha comisión técnica de mellora

Por outra banda, a Dirección Xeral da Función Pública anunciou que se constituirá unha comisión técnica de mellora dos procesos selectivos, coa participación das organizacións sindicais, co fin de elaborar no prazo de dous meses unhas novas instrucións relativas ao funcionamento dos tribunais de selección.


5/5 (3 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: