Vieiros

Será o vindeiro luns en Xirona. A cidade catalá está a acoller estes días o Foro Mundial polos Dereitos Colectivos dos Pobos, un congreso que verá nacer nun acto fundacional a Rede Mundial polos Dereitos dos Pobos. Xosé Manuel Beiras, presidente da Fundación Galiza Sempre, presentará, canda representantes do Quebec, Kurdistán, Catalunya e diversos pobos indíxenas os seus obxectivos.

Principalmente, a misión que se marca esta nova Rede Mundial é construír un espazo de encontro entre pobos e nacións sen estado e orixinarios a escala mundial que, dunha banda, “permita un mellor coñecemento recíproco dos discursos e as prácticas que teñen que ver co exercicio dos respectivos dereitos colectivos” e, da outra, “xunte esforzos orientados a unha maior visibilidade da existencia dunha diversidade nacional, cultural e lingüística non reflectida na actual configuración internacional”.

A súa constitución decidiuse no último Foro Social Mundial, celebrado en xaneiro de 2009 en Belem do Pará (Brasil).

• Podes ver aquí a información completa e o programa do Foro Mundial polos Dereitos Colectivos dos Pobos.